തൊഴിലാളികളുടെ പേരു പറഞ്ഞു അധികാരത്തിലേറിയവർക്കെതിരെ തൊഴിലാളികൾ തന്നെ സമരം ചെയ്യുന്നു ! അതിനെ പരിഹസിക്കാനും അവഗണിക്കാനും ഒരു വ്യാജ ഇടത് പക്ഷത്തിനേ സാധിക്കൂ ! ജോയ് മാത്യു

ഒരു സിനിമ നടൻ എന്നതിനപ്പുറം രാഷ്ട്രീയ സാമൂഹ്യ വിഷയങ്ങളിൽ തന്റെ അഭിപ്രായങ്ങൾ തുറന്ന് പറയുന്ന ആളാണ് നടൻ ജോയ് മാത്യു. ആശാ വർക്കർമാർ അവരുടെ വേതന വർധനവ് ഉൾപ്പെടെ വിവിധ ആവശ്യങ്ങൾ ഉന്നയിച്ചുള്ള സമരം ശക്തമാക്കി മുന്നോട്ട് പോകുന്ന സാഹചര്യത്തിൽ സർക്കാർ അവരോട് അനീതി കാണിക്കുകയാണ് എന്ന ആക്ഷേപം വലിയ വിമർശനങ്ങൾക്ക് കാരണമാകുന്നുണ്ട്. സെക്രട്ടേറിയറ്റിനു മുന്നിൽ ആശാ വർക്കർമാർ അനിശ്ചിതകാല നിരാഹാരം തുടങ്ങി.

തങ്ങളുടെ പ്രശ്നങ്ങൾക്ക്  തീരുമാനമാകാതെ പിൻമാറില്ലെന്നു സമരത്തിനു നേതൃത്വം നൽകുന്ന കേരള ആശാ ഹെൽത്ത് വർക്കേഴ്സ് അസോസിയേഷൻ അറിയിച്ചു. ഇപ്പോഴിതാ ഈ വിഷയത്തിൽ സർക്കാരിനെ വിമർശിച്ച് ജോയ് മാത്യു പങ്കുവെച്ച ഒരു കുറിപ്പാണ് ഏറെ ശ്രദ്ധ നേടുന്നത്. ആ വാക്കുകൾ ഇങ്ങനെ, പണ്ട് മുതലാളിക്കെതിരെയാണ് തൊഴിലാളി സമരം ചെയ്തിരുന്നെങ്കിൽ ഇന്ന് അവർക്ക് തൊഴിലാളികളുടെ പേരു പറഞ്ഞു അധികാരത്തിലേറിയവർക്കെതിരെ സമരം ചെയ്യേണ്ട അവസ്ഥയാണ്.

ഏത് തൊഴിലും, അഭിമാനകരമാണ്. അത് ആശാവർക്കർമാരായാലും അഴുക്ക് ചാലിൽ ഇറങ്ങി അത് വൃത്തിയാക്കുന്നരായാലും. അതുപോലെ ഏതു സമരവും ആത്മാഭിമാനത്തിനും കൂടി ഉള്ളതാണ്. അതിനെ പരിഹസിക്കാനും അവഗണിക്കാനും ഒരു വ്യാജ ഇടത് പക്ഷത്തിനേ സാധിക്കൂ. ആശാവർക്കർമാരുടെ സമരത്തിന് ഐക്യദാർഢ്യം. എന്നാണ് അദ്ദേഹം കുറിച്ചത്.

മുമ്പ് ഇതേ വിഷയത്തിൽ ആരോഗ്യമന്ത്രി വീണ ജോർജിനെ പരിഹരിച്ചും അദ്ദേഹം കുറിപ്പ് പങ്കുവെച്ചിരുന്നു, നമുക്ക് കേന്ദ്ര ഫണ്ട് കിട്ടാത്തത് കൊണ്ടാണെന്നും, കേന്ദ്രത്തിന് എതിരെ ഡൽഹിയിൽ പോയി സമരം ചെയ്യാൻ നിങ്ങൾക്ക് ഒപ്പം ഞാനും ഉണ്ടാകും എന്നാണ് വിഷയത്തിൽ ആരോഗ്യമന്ത്രി വീണ ജോർജ് പ്രതികരിച്ചത്.

ഇതിന് ജോയ് മാത്യു പറഞ്ഞ വാക്കുകൾ, ആശാവർക്കർമാർ നിരാശരാകരുത് നിങ്ങൾക്ക് വേണ്ടി നിങ്ങളോടൊപ്പം ഡൽഹിയിൽ സമരം ചെയ്യാൻ നമ്മുടെ വിപ്ലവ റാണി തയ്യാറാണെന്ന്, ഇനി അതിനു വണ്ടിക്കൂലി ഇല്ലാത്തതാണ് പ്രശ്നമെങ്കിൽ അവരുടെ വണ്ടിക്കൂലി ഞാൻ തരുന്നതാണ്..
ശ്രദ്ധിക്കുക : കമന്റ് ബോക്സിൽ വന്ന് നിരങ്ങുന്ന നർമ്മ രഹിതരെ നിരീക്ഷിക്കാൻ കപ്പിത്താന്റെ പോ,ലീ,സുണ്ട് എന്നുമാണ് അദ്ദേഹം പങ്കുവെച്ച പോസ്റ്റ്.