‘സ്നേഹത്തിന്റെ കടയിൽ ഒരു മെമ്പര്‍ഷിപ്പെടുക്കുകയാണ്’ ! വെറുപ്പ് മാത്രം ഉത്പാദിപ്പിക്കുന്ന ഫാക്ടറിയിൽ നിന്ന് സ്നേഹവും കരുതലും ഞാൻ പ്രതീക്ഷിച്ചുവെന്നതാണ് എന്റെ തെറ്റ് ! സന്ദീപ് വാര്യർ !
വർഷങ്ങളായി വിശ്വസിച്ച പ്രസ്ഥാനത്തെ ഒരു നിമിഷം കൊണ്ട് തള്ളി പറഞ്ഞ് മറുകണ്ടം ചാടുന്ന രാഷ്ട്രീയ നേതാക്കളെ കേരളം ഒരുപാട് കണ്ടതാണ്. ഇപ്പോഴിതാ അത്തരത്തിൽ ബിജെപി വിട്ട് കോൺഗ്രസ്സിൽ എത്തിയ സന്ദീപ് വാര്യർക്ക് പറയാനുള്ളത് ഇങ്ങനെ, സ്നേഹത്തിന്റെ കടയിൽ ഒരു മെമ്പര്‍ഷിപ്പെടുക്കുകയാണെന്നാണ്. ബിജെപി വിട്ടെത്തിയ സന്ദീപ് വാര്യരെ പാലക്കാട്ടെ കെപിസിസി ഓഫീസിൽ കെ സുധാകരൻ, പ്രതിപക്ഷ നേതാവ് വിഡി സതീശൻ അടക്കം കോൺഗ്രസ് നേതാക്കൾ ഷോൾ അണിയിച്ചാണ് സ്വാഗതം ചെയ്തത്.
ശേഷം മാധ്യമങ്ങളെ കണ്ട സന്ദീപ് വാര്യർക്ക് പറയാനുള്ളത് ഇങ്ങനെ, വെറുപ്പ് മാത്രം ഉത്പാദിപ്പിക്കുന്ന ഫാക്ടറിയിൽ നിന്ന് സ്നേഹവും കരുതലും ഞാൻ പ്രതീക്ഷിച്ചുവെന്നതാണ് എന്റെ തെറ്റ്. പലഘട്ടത്തിലും പിന്തുണ തേടി പെട്ട് പോയ അവസ്ഥയിലായിരുന്നു ബിജെപിയിൽ ഞാൻ. നമ്മുടെ രാജ്യത്ത് നിലനിൽക്കുന്ന ജനാധിപത്യത്തെ മതിക്കാത്ത ഒരിടത്ത് വീര്‍പ്പ് മുട്ടി കഴിയുകയായിരുന്നു ഞാൻ ഇത്രയും നാൾ.
അതുകൂടാതെ, സാധാരണക്കാരായ ജനപക്ഷത്തിനൊപ്പം നിന്ന് സംസാരിക്കാനുളള സ്വാതന്ത്രം പോലുമില്ലാതെ അച്ചടക്ക നടപടി നേരിട്ടു. സ്നേഹത്തിന്റെ ഇടത്തേക്കാണ് താൻ വരുന്നതെന്നും സന്ദീപ് വാര്യര്‍ പാലക്കാട്ട് കെപിസിസി ആസ്ഥാനത്ത് നടത്തിയ വാര്‍ത്താ സമ്മേളനത്തിൽ പറഞ്ഞു. സിപിഎം -ബിജെപി ഡീലിനെ എതിര്‍ത്തതാണ് ഞാൻ ചെയ്ത തെറ്റ്. കരിവന്നൂരും കൊടകരയും പരസ്പരം വെച്ചുമാറുന്നതിനെ എതിര്‍ത്തുവെന്നതാണ് ഞാൻ ചെയ്ത തെറ്റ്. കൊടകര കുഴൽപ്പണ കേസ് പ്രതി ധര്‍മ്മ രാജന്റെ കോൾ ലിസ്റ്റിൽ പേരില്ലാതെ പോയതാണ് ഞാൻ ചെയ്ത കുറ്റം.
കൂടാതെ ഈ വിഷയത്തെ കുറിച്ച് മാധ്യമ ചര്‍ച്ചയ്ക്ക് പോകരുതെന്ന് പോലും എന്നോട് പറഞ്ഞു, വിലക്ക് നേരിട്ടു. മതം പറയാനോ, കാലുഷ്യമുണ്ടാക്കാനോ എനിക്ക് താൽപര്യമില്ല. വ്യക്തിപരമായി ഫേസ്ബുക്കിലിട്ട ഒരു പോസ്റ്റിന്റെ പേരിൽ ഒരു വര്‍ഷക്കാലം നടപടി നേരിട്ടു. ഞാനിന്ന് ഈ നിമിഷം കോൺഗ്രസിന്റെ ത്രിവര്‍ണ്ണ ഷാൾ അണിഞ്ഞ് ഇരിക്കുന്നുണ്ടെങ്കിൽ അതിന്റെ ഉത്തരവാദിത്തം കെ സുരേന്ദ്രനും സംഘത്തിനുമാണ് എന്നും സന്ദീപ് വാര്യർ പറയുന്നു.
അതേസമയം സന്ദീപിനെ പരിഹസിച്ച് കെ സുരേന്ദ്രനും രംഗത്ത് വന്നിരുന്നു, സന്ദീപിന് വലിയ കസേരകൾ കിട്ടട്ടെയെന്നും, സന്ദീപ് ബലിദാനികളെ വഞ്ചിച്ചുവെന്നും കെ സുരേന്ദ്രൻ പറഞ്ഞു. സന്ദീപ് വാര്യര്‍ കോണ്‍ഗ്രസില്‍ ചേര്‍ന്നത് ബിജെപിയില്‍ ഒരു ചലനവും ഉണ്ടാക്കില്ലെന്നും, ഇത് ഉറപ്പിച്ചു തന്നെയാണ് പറയുന്നതെന്നും കെ സുരേന്ദ്രന്‍ വ്യക്തമാക്കി.
Leave a Reply