ഒരുപാട് തെറ്റുകള്‍ ചെയ്തിട്ടാണ് സിനിമയിലെ പല ശരികളും പഠിക്കാന്‍ പറ്റിയത് ! എന്റെ അനുഭവങ്ങളാണ് എന്നെ മാറ്റിയത് ! ഉണ്ണി മുകുന്ദൻ !
ഇന്ന് മലയാള സിനിമയിൽ മുൻ നിരയിൽ ഉള്ള നായകനാണ് ഉണ്ണി മുകുന്ദൻ, നടന്റെ ഏറ്റവും പുതിയ സിനിമ ‘മാർകോ’ റിലീസിന് തയ്യാറെടുക്കുകയാണ്, ഇപ്പോഴിതാ സിനിമ ജീവിതം തന്റെ വ്യക്തി ജീവിതത്തിൽ വരുത്തിയ മാറ്റങ്ങളെ കുറിച്ചും തുടക്കകാലത്ത് നേരിട്ട പ്രതിസന്ധികളെ കുറിച്ചും സംസാരിക്കുകയാണ് ഉണ്ണി മുകുന്ദൻ.
അദ്ദേഹത്തിന്റെ വാക്കുകൾ ഇങ്ങനെ, സിനിമയില്‍ എത്തിക്കഴിഞ്ഞപ്പോള്‍ അഭിനയം നിര്‍ത്താം എന്ന് തോന്നിയിരുന്നു. എനിക്കൊപ്പവും അതിനു ശേഷവും സിനിമയിലെത്തിയവരെല്ലാം കേരളത്തില്‍ ജനിച്ചു വളര്‍ന്നവരാണ്. അവര്‍ക്ക് ഇവിടെ സൗഹൃദങ്ങളുണ്ട് ബന്ധുക്കളുണ്ട്, മറ്റു വഴികളുണ്ട്. സിനിമാ സെറ്റിലും മറ്റുമുണ്ടാവുന്ന പ്രതിസന്ധികള്‍ പറയാന്‍ അവര്‍ക്ക് ഒരുപാട് പേരുണ്ട്.
പക്ഷെ എനിക്ക് അങ്ങനെ ആരും തന്നെ ഉണ്ടായിരുന്നില്ല, ഗുജറാത്തിൽ ജനിച്ചുവളർന്ന എനിക്ക് മലയാളം എഴുതാനും വായിക്കാനും പോലും അറിയില്ലായിരുന്നു. അഭിപ്രായം ചോദിക്കാന്‍, മനസുതുറന്നു സംസാരിക്കാന്‍ ആരുമില്ല. ഒരുപാട് പരിഹാസങ്ങള്‍ കേട്ടിട്ടുണ്ട്. സിനിമയിലെ ബഹളവും ചീത്തവിളിയൊന്നും സഹിക്കാനാകാതെ കരഞ്ഞിട്ടുണ്ട്.
സിനിമ തന്നെ ഉപേക്ഷിച്ച് പോകാൻ തയ്യാറായ സമയത്താണ് ലാൽ ജോസ് സാറിന്റെ വിക്രമാദിത്യൻ ചെയ്യുന്നത്. വിക്രമാദിത്യനില്‍ എത്തിയപ്പോള്‍ ഞാന്‍ ഈ സിനിമയില്‍ വേണോ എന്ന് എനിക്ക് സംശയം തോന്നി. ലാലുച്ചേട്ടന്‍ ധൈര്യം തന്നുകൊണ്ടിരുന്നു.അങ്ങനെ ആ സിനിമ കഴിഞ്ഞപ്പോഴാണ് എനിക്ക് മനസിലായത് ഒരു നടനായി നില്‍ക്കാനുള്ള യോഗ്യത എനിക്കുണ്ടെന്ന്.
സിനിമയോടുള്ള എന്റെ സ്‌നേഹം സത്യസന്ധമായിരുന്നു. അതുകൊണ്ടാണ് ഞാന്‍ ഇവിടെ പിടിച്ചു നിന്നത്. പക്ഷെ ഒരുപാട് തെറ്റുകള്‍ ചെയ്തിട്ടാണ് സിനിമയിലെ പല ശരികളും പഠിക്കാന്‍ പറ്റിയത്. ഇത്തരം അനുഭവങ്ങളാണ് ഉണ്ണി മുകുന്ദന് എന്ന വ്യക്തിയെ ബില്‍ഡ് ചെയ്തത്, ഒറ്റയ്ക്ക് നില്‍ക്കുന്നവരോട് ദൈവത്തിന് തോന്നുന്ന കാരുണ്യം അക്കാലത്ത് എനിക്കും കിട്ടിയിട്ടുണ്ട്. പ്രശ്നങ്ങളും വിവാദങ്ങളും ബുദ്ധിമുട്ടുകളും എല്ലാമുണ്ടായപ്പോള്‍ ഒറ്റയ്ക്കിരുന്ന് രക്ഷിക്കണേ എന്ന് പ്രാര്‍ഥിച്ചിട്ടുണ്ട്. ദൈവത്തിന് എന്നോടൊരു സഹതാപമുണ്ടെന്ന് തോന്നാറുണ്ട് എന്നും ഉണ്ണി മുകുന്ദൻ വ്യക്തമാക്കി.
Leave a Reply