‘ആര്യയെ മേയറാക്കിയത് ആനമണ്ടത്തരം, വിവരക്കേട് പറയുന്നവരെ വിരമിക്കൽ പ്രായം നോക്കാതെ പുറത്താക്കണം’ ! കൊല്ലം ജില്ലാ സമ്മേളനത്തിൽ രൂക്ഷവിമർശനം !

കേരള ചരിത്രത്തിൽ തന്നെ ഏറ്റവും പ്രായം കുറഞ്ഞ മേയർ എന്ന റെക്കോർഡ് കൂടി നേടിയെടുത്ത ആളാണ് തിരുവനന്തപുരം മേയർ ആര്യ രാജേന്ദ്രൻ. എന്നാൽ തുടക്കം മുതൽ തന്നെ ഏറെ വിമർശനങ്ങളെ നേരിടുന്ന ആര്യ ഏറെ വിവാദങ്ങളിൽ പെട്ടിരുന്നു. എന്നാൽ ഇപ്പോഴിതാ ആര്യയെ വിമർശിച്ച് പാർട്ടി തന്നെ രംഗത്ത് വന്നിരിക്കുകയാണ്. യുവത്വത്തിന് അവസരം എന്ന പേരിൽ ആര്യ രാജേന്ദ്രനെ തിരുവന‌ന്തപുരം കോർപറേഷനിൽ മേയറാക്കിയത് ആനമണ്ടത്തരമായെന്ന് സിപിഎം കൊല്ലം ജില്ലാ സമ്മേളനം വിലയിരുത്തിയത്.

തിരുവനന്തപുരം  കോർപറേഷൻ ഡിവിഷനുകളിൽ ഇപ്പോൾ പലയിടത്തും ബിജെപി മുന്നേറ്റമാണ് കാണാൻ കഴിയുന്നത്. ആര്യയുടെ പക്വതയില്ലാത്ത പെരുമാറ്റം ഇപ്പോൾ മാത്രമല്ല, ഭാവിയിലും പാർട്ടിക്കു ദോഷമാകുമെന്ന് സമ്മേളനത്തിൽ പ്രതിനിധികൾ വ്യക്തമാക്കി. തലേദിവസം വരെ നടത്തിയ വർഗീയ വിദ്വേഷ രാഷ്ട്രീയത്തെ മറന്നു സന്ദീപ് വാരിയരെ ‘ഉത്തമനായ സഖാവ്’ ആക്കാൻ നോക്കിയ നേതാക്കൾ പാർട്ടിയിലുണ്ട്. കോൺഗ്രസിൽ ചേർന്നപ്പോൾ അയാളുടെ വർഗീയ രാഷ്ട്രീയത്തെ ഉപയോഗിച്ച് പത്രപ്പരസ്യം നൽകി ന്യൂനപക്ഷങ്ങളെ കബളിപ്പിക്കാൻ ശ്രമിച്ചെന്നും പ്രതിനിധികൾ വിമർശിച്ചു.

ആര്യ രാജേന്ദ്രന് മാത്രമല്ല ഗതാഗത മന്ത്രി കെബി ഗണേഷ് കുമാറിനെയും പാർട്ടി നേതൃത്വം വിമർശിച്ചു, ഇടതുമുന്നണി സ്ഥാനാർഥിയായി പത്തനാപുരത്തു മത്സരിച്ചു വിജയിച്ചു മന്ത്രിയായ ഗണേഷ്കുമാർ സിപിഎമ്മിനു ബാധ്യതയാണെന്നു പ്രതിനിധികൾ വിമർശിച്ചു. ഈ സർക്കാരിൽ രാഷ്ട്രീയ അഴിമതി കുറഞ്ഞെങ്കിലും ഉദ്യോഗസ്ഥ തലത്തിൽ വൻ അഴിമതി അരങ്ങേറുന്നു. പാർട്ടിക്കാർക്കു പൊലീസ് സ്റ്റേഷനിൽപ്പോലും നീതി കിട്ടുന്നില്ല. മറ്റു പാർട്ടിക്കാർക്കു കിട്ടുന്ന പരിഗണന പോലും പാർട്ടിക്കാർക്കില്ല എന്നും ആരോപണമുണ്ട്.

അതുമാത്രമല്ല പാർലമെന്റിൽ ഇടതുപക്ഷത്തിനു മുഖമില്ലാതായി. ഡിവൈഎഫ്ഐ നേതാവ് എഎ റഹീമിനെ രാജ്യസഭയിലേക്ക് അയച്ചത് എന്തിനു വേണ്ടിയാണ്.. ആൾ മോശമാണെന്നു പറയുന്നില്ലെങ്കിലും പ്രകടനം പരിതാപകരമാണെന്നും പ്രതിനിധികൾ വിമർശിച്ചു. പാർട്ടിയിൽ വിരമിക്കൽ പ്രായം 75 വയസ് നോക്കിയല്ല കണക്കാക്കേണ്ടത്. വിവരക്കേട് പറയുന്ന നേതാക്കളെ അപ്പോൾ തന്നെ ഒഴിവാക്കണമെന്നും വിമർശനമുണ്ടായി.

പാർട്ടിയുടെ തന്നെ ഈ വാക്കുകളെ എടുത്തുകാട്ടി പരിഹാസവുമായി ഇപ്പോൾ നിരവധി പേരാണ് സമൂഹ മാധ്യമങ്ങളിൽ എത്തുന്നത്. അതിൽ ശ്രീജിത്ത് പണിക്കർ പങ്കുവെച്ച പരിഹാസ പോസ്റ്റ് ഇങ്ങനെ, ആര്യയെ മേയർ ആക്കിയത് ആനമണ്ടത്തരം ആണെന്ന് ഞാൻ കരുതുന്നില്ല. മറിച്ച്, ആര്യ മേയർ ആയതുകൊണ്ട് കുറേ കാര്യങ്ങൾ മനസ്സിലാക്കാൻ നാട്ടുകാർക്ക് കഴിഞ്ഞു എന്നതാണ് സത്യം — പൊങ്കാല, യദു, നിയമനം, ശുചീകരണം അങ്ങനെ എന്തെല്ലാം കാര്യങ്ങൾ. ശരിയല്ലേ.. എന്നാണ് ശ്രീജിത്ത് കുറിച്ചത്….