ദേഹത്ത് മുരുകൻ കയറും ! ഞാനൊരു വിശ്വാസിയാണ്, പരിഹസിക്കുന്നവർക്ക് അത് തുടരാം ! മുടങ്ങാതെ ഇത്തവണയും കാർത്തിക് സൂര്യ !

മലയാളികൾക്ക് വളരെ പരിചിതനായ ആളാണ് യുട്യുബറും അവതാരകനുമായ കാർത്തിക് സൂര്യ. ഇത്തവണയും തൈപ്പൂയത്തിന് അഗ്നി കാവടിയും ശൂലം കുത്തുകയും ചെയ്തിരിക്കുകയാണ്, കഴിഞ്ഞ തവണ ഇതിന്റെ പേരിൽ ഏറെ വിമർശങ്ങൾ നേരിട്ട ആളുകൂടിയായിരുന്നു കാർത്തിക് സൂര്യ. എന്നാൽ അതൊന്നും തന്റെ വിശ്വാസങ്ങളെ തകർക്കില്ല എന്ന് തെളിയിച്ചിരിക്കുകയാണ് കാർത്തിക്. എന്നാൽ ഇപ്പോഴിതാ തന്റെ വിമര്ശകരോട് കാർത്തിക്കിന് പറയാനുള്ള വാക്കുകളാണ് ഏറെ ശ്രദ്ധ നേടുന്നത്. ‘ന്യൂസ് 18 കേരള’യോട് പ്രതികരിക്കുകയായിരുന്നു കാർത്തിക് സൂര്യ.

വാക്കുകൾ ഇങ്ങനെ, ഞാനൊരു തികഞ്ഞ ഈശ്വര വിശ്വാസിയാണ്, 16-ാം വയസ്സിൽ ആദ്യ വേൽക്കാവടി എടുത്ത ശേഷം പിന്നീട് പഠനവും കാര്യങ്ങളുമായി മുന്നോട്ടുപോയി. 2023 തനിക്ക് അത്ര നല്ല വർഷമല്ലായിരുന്നു. മലേഷ്യയിലെ ബാട്ടു കേവ്സ് എന്ന സ്ഥലത്ത് ഒരു മുരുക ക്ഷേത്രമുണ്ട്. വലിയ മലയിലൂടെ 272 പടി കയറി വേണം മുരുകനെ കാണാൻ. അവിടെ എത്തിയപ്പോൾ മനസ്സ് ഭയങ്കരമായി കൂളായി. അന്നാണ് വേൽ കുത്തി അഗ്നിക്കാവടി എടുക്കണമെന്ന ആഗ്രഹം മനസ്സിൽ കയറിയതെന്നും കാർത്തിക് പറയുന്നു.

ശേഷം തിരികെ നാട്ടിൽ തിരിച്ചെത്തി തൈപ്പൂയം തിയതി നോക്കി കാത്തിരുന്നു. ശേഷം  21 ദിവസത്തെ വ്രതമെടുത്തു. അത് ആദ്യത്തെ അഗ്നിക്കാവടിയായിരുന്നു. ഇതിന് മുമ്പും ഞാൻ  വേൽ കുത്തിയിട്ടുണ്ട്. അത് വലിയ വേൽ ആയിരുന്നു. അഗ്നിക്കാവടി എടുക്കുമ്പോൾ വലിയ വേൽ കുത്താൻ പറ്റില്ല. അതിനാൽ, ഒന്നരയടി നീളമുള്ള ചെറിയ വേൽ ആണ് കുത്തിയതെന്നും കാർത്തിക് സൂര്യ വിശദീകരിച്ചു.

അനാവശ്യമായി വിമര്ശിക്കുന്നവരോട് എനിക്ക് പ്രത്യേകിച്ച് ഒന്നും പറയാനില്ല. കാരണം ഇതെന്റെ വിശ്വാസമാണ്, എൻ്റെ അനുഭവം ഞാൻ പറയാം. കാവടിക്ക് വ്രതമെടുത്ത് നിൽക്കുമ്പോൾ ശരീരം അത്രയും ശുദ്ധമായാണ് സൂക്ഷിക്കുന്നത്. അപ്പോഴത്തെ ഏക ലക്ഷ്യം കാവടിയും വേലും എടുത്ത് ഭഗവാൻ്റെ അനുഗ്രഹം വാങ്ങിക്കുക എന്നതാണ്.  ദൈവത്തോട് കരഞ്ഞ് പ്രാർഥിക്കുന്ന ഒരു സമയത്ത് തനിയെ വരുന്നതാണ് അത്. അപ്പോഴുണ്ടാകുന്ന മാനസ്സിക സമാധാനം പറഞ്ഞറിയിക്കാൻ പറ്റാത്തതാണ്. അത് അനുഭവിച്ചിട്ടില്ലാത്തവരോട് എത്ര പറഞ്ഞാലും മനസ്സിലാകില്ല എന്നും കാർത്തിക് പറയുന്നു.

ദേഹത്ത് മുരുകൻ കയറുമോ ഇല്ലിയോ എന്ന് ചോദിച്ചാൽ, എനർജിയാണ് ശരീരത്തിൽ തോന്നുന്നത്. ദൈവം എന്നത് യഥാർത്ഥത്തിൽ ഒരു ശക്തിയാണ്. ശരീരത്തിൽ വരുന്ന എനർജി എക്സ്പ്ലോർ ആയി പോകുന്നതാണ് ദേഹത്ത് ദൈവം കൂടുന്നുവെന്ന് പറയുന്നത്. നെഗറ്റീവ് എനർജി കയറുമ്പോഴാണ് പ്രേതമൊക്കെ കയറിയെന്ന് പറയുന്നത്. ദേഹത്ത് മുരുകൻ കയറുമോയെന്ന് ചോദിച്ചാൽ ഞാൻ പ്രാർത്ഥിക്കുന്നത് മുരുകനെയാണ്, ആ എനർജിയാണ് എനിക്ക് ദേഹത്തോട്ട് കയറുക. ഇതാണ് എന്റെ പരിമിതമായി അറിവ്. ശരിയാണ് കാവടി ചെയ്യുമ്പോൾ ദേഹത്ത് മുരുകൻ കയറും എന്നും കാർത്തിക് പറയുന്നു.