
കേരളത്തിന് കൈത്താങ്ങായി തമിഴ്നാട് ! 5 കോടി രൂപ അനുവദിച്ച് മുഖ്യമന്ത്രി സ്റ്റാലിൻ ! മെഡിക്കൽ സംഘത്തെ അയക്കും ! മറ്റെന്ത് സഹായവും ചെയ്യാൻ തയ്യാറെന്ന് സ്റ്റാലിൻ !
രാജ്യം മുഴുവൻ വയനാട്ടിലേക്ക് ഉറ്റുനോക്കുന്ന സ്ഥിതിയാണ് ഇപ്പോഴുള്ളത്, അപ്രതീക്ഷിത ദുരന്തത്തിൽ പകച്ച് നിൽക്കുകയാണ് ഒരു നാട്, തങ്ങളുടെ ഒപ്പം ഉണ്ടായിരുന്നവർ പോലും എവിടെയാണ് എന്നറിയാത്ത അവസ്ഥ, ഉറ്റവരെ അന്വേഷിച്ച് എങ്ങും പരക്കം പായുന്ന ബന്ധുക്കൾ, മരണം 75 കടന്നിരിക്കുകയാണ്, ഇപ്പോഴിതാ എപ്പോഴെത്തെയും പോലെ ആപത്ത് ഘട്ടത്തിൽ കേരളത്തെ ചേർത്ത് പിടിക്കുകയാണ് തമിഴ്നാട്,വയനാട്ടിലെ മേപ്പാടിയിലുണ്ടായ ഉരുൾപൊട്ടലിൽ അടിയന്തര സഹായമായി 5 കോടി രൂപ അനുവദിച്ച് തമിഴ്നാട് മുഖ്യമന്ത്രി എം കെ സ്റ്റാലിൻ.
അതുകൂടാതെ നിലവിലെ സ്ഥിതിഗതികൾ കേരള മുഖ്യമന്ത്രി പിണറായി വിജയനെ ഫോണിൽ വിളിച്ച് അന്വേഷിക്കുകയും ഒപ്പം അഗാധമായ ദുഃഖം രേഖപ്പെടുത്തുകയും അനുശോചനമറിയിക്കുകയും ചെയ്ത സ്റ്റാലിൻ ദുരന്തത്തിൽ തമിഴ്നാടിന്റെ എല്ലാ സഹായസഹകരണങ്ങളും വാഗ്ദാനം ചെയ്യുകയും ചെയ്തു. തമിഴ്നാട് മുഖ്യമന്ത്രിയുടെ ദുരിതാശ്വാസ നിധിയിൽ നിന്നുമാണ് സഹായമായ അഞ്ചുകോടിരൂപ അനുവദിച്ചത്.

മറ്റെന്ത് സഹായം വേണമെങ്കിലും ചെയ്യാൻ തങ്ങൾ തയ്യാറാണെന്ന് അറിയിച്ച അദ്ദേഹം നിലവിൽ ദുരിതാശ്വാസ പ്രവർത്തനങ്ങൾക്ക് സഹായമായി സീനിയർ ഐ.എ.എസ് ഉദ്യോഗസ്ഥരായ കെ.എസ്.സമീരൻ, ജോണി ടോം വർഗീസ് എന്നിവരുടെ നേതൃത്വത്തിൽ ഒരു സംഘം ഉദ്യോഗസ്ഥരെ വയനാട്ടിലേക്ക് നിയോഗിച്ചിട്ടുണ്ട്. രക്ഷാപ്രവർത്തനത്തിനായി അഗ്നിശമനസേനയിലെ ജോയിന്റ് ഡയറക്ടറുടെ നേതൃത്വത്തിൽ 20 രക്ഷാപ്രവർത്തകരേയും ഒരു എസ്. പിയുടെ നേതൃത്വത്തിൽ 20 ദുരന്തനിവാരണ ടീമിനേയും 10 ഡോക്ടർമാരും നഴ്സുമാരുമടങ്ങുന്ന മെഡിക്കല് സംഘത്തേയും ചുമതലപ്പെടുത്തി. ഇവർ കേരളത്തിലെ ഉദ്യോഗസ്ഥർക്കൊപ്പം പ്രവർത്തിക്കുമെന്ന് മുഖ്യമന്ത്രി സ്റ്റാലിൻ അറിയിച്ചു.
Leave a Reply