‘ജയസൂര്യ നന്മമരം ചമയുന്ന നടൻ’ ! അദ്ദേഹം ഇന്നും ആ രണ്ട് ലക്ഷം രൂപ തിരിച്ച് ചോദിച്ചിട്ടില്ല ! ജയസൂര്യയെ കുറിച്ച് സംവിധായകൻ !

മലയാള സിനിമയിൽ ജനപ്രിയ നടന്മാരിൽ മുനിരയിൽ ഉള്ള നടനാണ് ജയസൂര്യ, ഒരു നടൻ എന്ന നിലയിൽ അല്ലാതെ തന്റെ ഉറച്ച നിലപാടുകൾ വിളിച്ചുപറയാൻ മടിയില്ലാത്ത ആളുകൂടിയാണ് ജയസൂര്യ, അതിന്റെ പേരിൽ തന്നെ അദ്ദേഹം ഏറെ പരിഹാസങ്ങൾ നേരിടാറുമുണ്ട്. ഇപ്പോഴിതാ ജയസൂര്യയാണ് മലയാള സിനിമയില്‍ നന്മമരം ചമയുന്ന നടന്‍ എന്ന പോസ്റ്റിന് സംവിധായകന്‍ രതീഷ് രഘുനന്ദനന്‍ നല്‍കിയ മറുപടി വൈറലാകുന്നു. കോവിഡ് കാലത്ത് സാമ്പത്തിക ബുദ്ധിമുട്ട് അനുഭവിച്ചിരുന്ന സമയത്ത് തനിക്ക് പണം അയച്ചു തന്ന ആളാണ് ജയസൂര്യ എന്നാണ് സംവിധായകന്‍ പറയുന്നത്.

അദ്ദേഹത്തിന്റെ ആ വാക്കുകൾ ഇങ്ങനെ, “നന്മമരം ചമയലാണോ എന്നറിയില്ല. എനിക്കുണ്ടായ അനുഭവം പറയാം. ഞങ്ങള്‍ ഒരുമിച്ച് ഒരു സിനിമ ചെയ്യാന്‍ തീരുമാനിക്കുന്നു. വിജയ് ബാബു നിര്‍മ്മാതാവ്. പ്രീ പ്രൊഡക്ഷന്‍ തുടങ്ങി ദിവസങ്ങള്‍ക്കകം കോവിഡും ലോക്ഡൗണും വരുന്നു. എല്ലാം പൂട്ടിക്കെട്ടി. രണ്ടോ മൂന്നോ മാസങ്ങള്‍ കഴിഞ്ഞപ്പോള്‍ ജയേട്ടന്റെ വിളി ”എങ്ങനെ പോകുന്നെടാ കാര്യങ്ങള്‍?”, ഇങ്ങനെയൊക്കെ പോകുന്നുവെന്നു ഞാന്‍ പറഞ്ഞു.

അപ്പോൾ അദ്ദേഹം പറഞ്ഞു, ”ഇത്തിരി പൈസ ഞാൻ നിന്റെ അക്കൌണ്ടില്‍ ഇട്ടിട്ടുണ്ട് ട്ടോ”. എന്നാൽ അത് വേണ്ട എന്ന് പറയാവുന്ന ഒരു സാഹചര്യം ആയിരുന്നില്ല എന്റെ. ജയസൂര്യ എന്ന നടന് എന്നെ പോലെ ഒരാളെ ഓര്‍ത്തു സഹായിക്കേണ്ട ഒരു കാര്യവും ഉണ്ടായിരുന്നില്ല. ആ രണ്ട് ലക്ഷം ഇന്നും അദ്ദേഹം തിരിച്ചു വാങ്ങിയിട്ടുമില്ല. ഇതും ചിലപ്പോൾ നിങ്ങൾ പറഞ്ഞ നന്മമരം ചമയലിന്റെ ഭാഗമാകാം. അറിയില്ല” എന്നാണ് രതീഷ് രഘുനന്ദന്റെ കമന്റ്. നിരവധി പേരാണ് ജയസൂര്യയുടെ നല്ല മനസിനെ അഭിനന്ദിച്ച് എത്തിയത്.