മലയാള സിനിമയിൽ പുതിയ സംഘടന വരുന്നു ! നേതൃസ്ഥാനത്ത് ഇവരൊക്കെ ! തൊഴിലാളികളുടെ അവകാശങ്ങൾ സംരക്ഷിക്കപ്പെടുന്ന ഒരു സംഘടന ആയിരിക്കുമിത് ! കൂടുതൽ വിവരങ്ങൾ !

ഹേമ കമ്മറ്റി റിപ്പോർട്ടിന് ശേഷം മലയാള സിനിമ ലോകത്ത് നടക്കുന്നത് ഒരു സിനിമയെ വെല്ലുന്ന സംഭവ വികാസങ്ങളാണ്, അമ്മ താര സംഘടനാ ഒരു പരാജയമായി മാറിയ ഈ സാഹചര്യത്തിൽ ഇപ്പോഴിതാ സിനിമ പിന്നണി പ്രവർത്തകർ ചേർന്ന് ഒരു പുതിയ സംഘടനാ രൂപീകരിക്കുകയാണ്, ഇപ്പോഴിതാ അത്തരത്തിൽ ഒരു സംഘടനാ രൂപംകൊണ്ടു കഴിഞ്ഞു, ‘പ്രോഗ്രസീവ് ഫിലിം മേക്കേഴ്സ്’ എന്ന് പേരിട്ടിരിക്കുന്ന സംഘടനയുടെ നേതൃസ്ഥാനത്ത് സംവിധായകരായ ആഷിക്ക് അബു, ലിജോ ജോസ് പെല്ലിശ്ശേരി, രാജീവ് രവി, അഞ്ജലി മേനോൻ, നടി റീമ കല്ലിങ്കൽ തുടങ്ങിയവരാണ് ഉള്ളത്. സംഘടനയുടെ പ്രാഥമിക ചർച്ചകൾ ആരംഭിച്ചിരിക്കുന്നതായി സംവിധായിക അഞ്ജലി മേനോൻ വെളിപ്പെടുത്തി.

സിനിമക്ക് അകത്തും പുറത്തും പ്രവർത്തിക്കുന്ന എല്ലാവരുടെയും സഹകരണം പ്രതീക്ഷിച്ചാണ് ഇപ്പോൾ ഇങ്ങനെ ഒരു നീക്കം ഉണ്ടായിരിക്കുന്നത്. തൊഴിലിടങ്ങൾ ശാക്തീകരിക്കുക, പുതിയ സിനിമ സംസ്കാരം രൂപീകരിക്കുക എന്നിവയാണ് സംഘടനയുടെ ലക്ഷ്യം. സംഘടനയെക്കുറിച്ചുള്ള വിശദാംശങ്ങൾ ഉൾപ്പെടുന്ന കത്ത് സിനിമ പ്രവർത്തകർക്കിടയിൽ നൽകിത്തുടങ്ങിയിട്ടുണ്ട്.

അതിന്റെ വിശദംശങ്ങൾ ഇങ്ങനെ, ‘സമത്വം, സഹകരണം, സാമൂഹിക നീതി എന്നീ മൂല്യങ്ങളിൽ വേരൂന്നിയ ഈ സംഘടന, തൊഴിലാളികളുടെയും നിർമ്മാതാക്കളുടെയും അവകാശങ്ങൾ സംരക്ഷിക്കപ്പെടുന്നുവെന്ന് ഉറപ്പാക്കുകയും വ്യവസായത്തെ അടുത്ത ഘട്ടത്തിലേക്ക് ഉയർത്തുന്നതിനുള്ള പ്രയത്നങ്ങളെ പ്രോത്സാഹിപ്പിക്കുകയും ചെയ്യും.

സിനിമ വ്യവസായത്തിന്റെ പിന്നണിപ്രവർത്തകർ എന്ന നിലയിൽ നമ്മളാണ് ഈ വ്യവസായത്തെ രൂപകല്പന ചെയ്യുന്നത്. അതിനാൽ തന്നെ തൊഴിലാളികളുടെ അവകാശങ്ങൾ സംരക്ഷിക്കപ്പെടുന്ന, എല്ലാവരേയും ഉൾക്കൊള്ളുന്ന തൊഴിലിടങ്ങൾ സൃഷ്ടിക്കാനും, നമ്മുടെ സംരംഭങ്ങൾ സുസ്ഥിരവും ധാർമ്മികവുമാണെന്ന് ഉറപ്പുവരുത്താനുമുള്ള ബാധ്യത നമുക്കുണ്ട്. ഒട്ടും എളുപ്പമല്ലെങ്കിലും ഈ മാറ്റം അത്യന്താപേക്ഷിതമാണ്.

പരസ്പര പിന്തുണയിലൂടെയും ഐക്യദാർഢ്യത്തിലൂടെയും മാത്രമേ ഇത് കൈവരിക്കാനാവുകയുള്ളു. ഈ ഉത്തരവാദിത്തങ്ങൾ നിർവഹിക്കുന്നതിനുള്ള പരസ്പരപൂരകങ്ങളായ സഹായങ്ങളും, പദ്ധതിഘടനകളും, മാർഗ്ഗരേഖകളും പിന്തുണയും നൽകുന്ന കൂട്ടായ്മയാണ്. നമുക്കൊരുമിച്ച് മലയാള ചലച്ചിത്ര വ്യവസായത്തെ നവീകരിക്കാം. സർഗ്ഗാത്മകമായ മികവിലും വ്യവസായിക നിലവാരത്തിലും മുൻപന്തിയിലേക്ക് അതിനെ നയിക്കാം.

മലയാള സിനിമ എന്ന വ്യവസായത്തിൻ്റെ ഭാഗമായ എല്ലാവരും സമഭാവനയോടെ പുലരുന്ന കൂടുതൽ മെച്ചപ്പെട്ട ഒരു ഭാവിക്കായുള്ള സ്വപ്നത്തിൽ നമുക്ക് ഒന്നിച്ച് അണിചേരാം, എന്നുമാണ് സംഘടനയുടെ രൂപീകരണ ലക്ഷ്യം വിശദീകരിക്കുന്ന കത്തിൽ പറയുന്നത്. അമ്മ താരാസഘടന ഇപ്പോൾ താൽക്കാലികമായി പ്രവർത്തന രഹിതമാണ്, ഈ സാഹചര്യത്തിൽ കൂടുതൽ പേരും പുതിയ സഘടനയെ പ്രോത്സാഹിപ്പിക്കുന്നുണ്ട്.