വയനാട് ദുരന്തത്തിൽ കൈത്താങ്ങായി ചിരഞ്ജീവിയും മകൻ രാം ചരണും ! ഒരു കോടി രൂപ ദുരിതാശ്വാസ നിധിയിലേക്ക്..!

ലോകം ഒന്നാകെ കേരളത്തെ ചേർത്ത് പിടിക്കുന്ന കാഴ്ചയാണ് നമ്മൾ കാണുന്നത്, സിനിമ മേഖലയിൽ നിന്നും വളരെ വലിയ സംഭാവനകളാണ് മുഖ്യമന്ത്രിയുടെ  ദുരിതാശ്വാസ നിധിയിലേക്ക് എത്തുന്നത്, ഇപ്പോഴിതാ വയനാട് ദുരന്തത്തിൽ കൈത്താങ്ങായി ചിരഞ്ജീവിയും മകൻ രാം ചരണും.ഇരുവരും ചേർന്ന് മുഖ്യമന്ത്രിയുടെ ദുരിതാശ്വാസ നിധിയിലേക്ക് 1 കോടി രൂപ സംഭാവന നല്‍കി. ചിരഞ്ജീവി എക്സിൽ പങ്കുവച്ച കുറിപ്പിലൂടെയാണ് ഈ കാര്യം പുറത്തുവിട്ടത്.

നിരവധി പേരാണ് ഇവർക്ക് നന്ദി പറഞ്ഞ് എത്തുന്നത്. കഴിഞ്ഞ കുറച്ച് ദിവസങ്ങളായി പ്രകൃതി ക്ഷോഭം മൂലം കേരളത്തിൽ നഷ്‌ടമായ നൂറുകണക്കിന് വിലയേറിയ ജീവനുകൾ തന്നെ ആഴത്തിൽ വിഷമിപ്പിക്കുന്നു” എന്ന് അദ്ദേഹം എക്സിൽ കുറിച്ചു. “ദുരിതബാധിതർക്കുള്ള ഞങ്ങളുടെ പിന്തുണയുടെ അടയാളമായി ഞാനും ചരണും ചേർന്ന് കേരള മുഖ്യമന്ത്രിയുടെ ദുരിതാശ്വാസ നിധിയിലേക്ക് ഒരു കോടി രൂപ സംഭാവന ചെയ്യുന്നു എന്നാണ് ഇവർ കുറിച്ചത്.

അതേസമയം, ചിരഞ്ജീവിയുടെ ബന്ധുവും നടനുമായ അല്ലു അര്‍ജുനും മുഖ്യമന്ത്രിയുടെ ദുരിതാശ്വാസ നിധിയിലേക്ക് സംഭാവന നല്‍കിയിട്ടുണ്ട്. ഇരുപത്തി അഞ്ച് ലക്ഷം രൂപയാണ് താരം സംഭാവനയായി നല്‍കിയത്. തനിക്ക് എപ്പോഴും സ്നേഹം തന്നിട്ടുള്ള നാടാണ് കേരളമെന്നും വയനാട് ദുരന്തത്തില്‍ താന്‍ ദുഃഖിതനാണെന്നും അല്ലു പറഞ്ഞിരുന്നു. കേരളത്തിൽ നിന്നും നിലവിൽ മോഹൻലാലാണ് ഏറ്റവും വലിയ തുക നൽകിയത് അദ്ദേഹം തന്റെ വിശ്വശാന്തി ഫൗണ്ടേഷന്‍ വഴി മൂന്ന് കോടിയുടെ പുനരുദ്ധാരണ പദ്ധതികളാണ് ലക്‌ഷ്യം ഇടുന്നത്. ഇത് കൂടാതെ ദുരിതാശ്വാസ നിധിയിലേക്ക് 25 ലക്ഷം രൂപകൂടി നൽകിയിരുന്നു.

മമ്മൂട്ടിയും നടൻ ദുൽഖർ സൽമാൻ 15 ലക്ഷവും മമ്മൂട്ടി 20 ലക്ഷവുമാണ് നൽകിയത്, നടൻ ഫാഹദ് ഫാസില്‍ മുഖ്യമന്ത്രിയുടെ ദുരിതാശ്വാസ നിധിയിലേക്ക് 25 ലക്ഷം രൂപ സംഭാവന നൽകി. സൂര്യ, ജ്യോതിക, കാർത്തി എന്നിവർ ചേർന്ന് 50 ലക്ഷം രൂപയും രശ്മിക മന്ദാന 10 ലക്ഷം രൂപയും കൈമാറി. കഴിഞ്ഞ ദിവസം വിക്രം 20 ലക്ഷം രൂപ നൽകിയിരുന്നു. സിനിമ മേഖലയിൽ നിന്നും ആദ്യമായി സഹായവുമായി എത്തിയത് നടൻ വിക്രം ആയിരുന്നു, അതുപോലെ തന്നെ 25 ലക്ഷം കമല്‍ ഹാസനും സംഭാവനയായി നല്‍കി.