അലോസരപെട്ടിട്ട് കാര്യമില്ല, ഊതി പെരുപ്പിച്ച കണക്കുകളല്ല, സത്യമായവയാണ് പുറത്തുവിട്ടത് ! ചാക്കോച്ചനെതിരെ ഫിയോക്ക്

ചലച്ചിത്ര നിർമ്മാതാക്കളും താരങ്ങളും തമ്മിൽ കഴിഞ്ഞ കുറച്ചു നാളുകളായി അഭിപ്രായ വ്യത്യാസങ്ങൾ ഉണ്ടായികൊണ്ടിരിക്കുകയാണ്, താരങ്ങൾ പ്രതിഫലം കുറക്കാൻ തയ്യാറാകണമെന്ന് ആവിശ്യം നിർമ്മാതാക്കൾ മുന്നോട്ട് വെച്ചപ്പോൾ താര സഘടനയായ ‘അമ്മ അതിനെ എതിർക്കുകയാണ് ഉണ്ടായത്. ഇപ്പോഴിതാ കഴിഞ്ഞ ദിവസം മലയാള സിനിമകളുടെ കളക്ഷന്‍ വിവരങ്ങള്‍ നിര്‍മ്മാതാക്കളുടെ സംഘടന പുറത്ത് വിട്ടിരുന്നു. അതിൽ ഓഫീസര്‍ ഓണ്‍ ഡ്യൂട്ടിയുടെ കണക്ക് വിവരങ്ങളും ഉണ്ടായിരുന്നു. എന്നാൽ ഇത് തെറ്റായ കണക്കാണെന്ന് പറഞ്ഞുകൊണ്ട് നടൻ കുഞ്ചാക്കോ ബോബൻ പ്രതികരിച്ചിരുന്നു.

അതിനെത്തുടർന്ന് ഇപ്പോൾ നടനെതിരെ  തിയേറ്റര്‍ ഉടമകളുടെ സംഘടനയായ ഫിയോക് രംഗത്ത് വന്നിരിക്കുകയാണ്. ഊതി പെരുപ്പിച്ച കണക്കുകളല്ല, സത്യമായവയാണ് പുറത്തു വിടുന്നത് എന്നാണ് ഫിയോക് പറയുന്നത്. പെരുപ്പിച്ച കണക്കുകള്‍ കാരണം തിയേറ്റര്‍ ഉടമകള്‍ പ്രതിസന്ധിയിലാണ്. കളക്ഷന്‍ കണക്ക് പുറത്തുവിടേണ്ടെങ്കില്‍ ‘അമ്മ’ നിര്‍മ്മാതാക്കളോട് ആവശ്യപ്പെടണമെന്നും ഫിയോക് വ്യക്തമാക്കി.

ഫിയോക് പ്രസിഡന്റ് വിജയകുമാര്‍ പറയുന്നതിങ്ങനെ, ”ഊതി പെരുപ്പിച്ച കണക്കുകളല്ല, സത്യമായവയാണ് പുറത്തു വിടുന്നത്. ഊതി പെരുപ്പിച്ച കണക്കുകള്‍ കണ്ട് പലരും സിനിമ പിടിക്കാന്‍ വന്നു കുഴിയില്‍ ചാടും. അത് ഒഴിവാക്കാന്‍ കൂടിയാണ് കണക്കുകള്‍ പുറത്തു വിടുന്നത്. കണക്ക് മൂടിവെക്കണമെങ്കില്‍ അത് നിര്‍മ്മാതാക്കള്‍ താരസംഘടന അമ്മയുമായി ചര്‍ച്ച ചെയ്യട്ടെ. പുതിയ നിര്‍മ്മാതാക്കളെ കുഴിയില്‍ ചാടിക്കാന്‍ ഇടനിലക്കാര്‍ ഉണ്ട്.

അവരുടെ കെണിയില്‍ അകപ്പെടാതിരിക്കാന്‍ കൂടിയാണ് ഇപ്പൊള്‍ കണക്കുകള്‍ പുറത്തു വിടുന്നത് എന്നാണ് ഫിയോക് പ്രസിഡന്റ് വിജയകുമാര്‍ പറയുന്നത്. അതേസമയം, ഫെബ്രുവരി മാസത്തിലെ കളക്ഷന്‍ റിപ്പോര്‍ട്ടിലാണ് ഓഫീസര്‍ ഓണ്‍ ഡ്യൂട്ടിയുടെ കണക്ക് വിവരങ്ങള്‍ ഉള്ളത്. ചിത്രത്തിന് 11 കോടി രൂപ വരവ് ലഭിച്ചുവെന്നാണ് സംഘടന പുറത്തുവിട്ട റിപ്പോര്‍ട്ടിലുള്ളത്. ഇതിനെ ചോദ്യം ചെയ്ത് കുഞ്ചാക്കോ ബോബന്‍ രംഗത്തെത്തുകയായിരുന്നു. 13 കോടി അല്ല സിനിമയുടെ ബജറ്റ് എന്നും, ഓഫീസർ ഇതിനോടകം 50 കോടിക്ക് മുകളില്‍ കളക്ഷന്‍ സിനിമ നേടിയിട്ടുണ്ടെന്നും കുഞ്ചാക്കോ ബോബന്‍ കഴിഞ്ഞ ദിവസം മനോരമ ഓൺലൈനോട് പ്രതികരിച്ചിരുന്നു.