മാധവ് ഗാഡ്ഗിലിന്റെ റിപ്പോര്‍ട്ട് പാഴായി പോകുന്നത് ദയനീയം ! ഭാവി തലമുറയ്ക്കായി പശ്ചിമഘട്ടത്തെ സംരക്ഷിക്കാനും ആവശ്യമായ നടപടികള്‍ നടപ്പിലാക്കേണ്ടത് അത്യാവിശം ! രചന നാരായണൻ കുട്ടി !
ഒരു അഭിനേത്രി എന്നതിനപ്പുറം തന്റെ നിലപാടുകളെ കുറിച്ച് തുറന്ന് സംസാരിക്കാറുള്ള ആളുകൂടിയാണ് രചന നാരായണൻ കുട്ടി, ഇപ്പോഴിതാ വയനാട്ടിലെ ഉരുൾപൊട്ടലിനെ മുൻനിർത്തി രചന കുറിച്ച വാക്കുകളാണ് ഏറെ ശ്രദ്ധ നേടുന്നത്. മാധവ് ഗാഡ്ഗിലിന്റെ റിപ്പോര്‍ട്ട് പാഴായി പോകുന്നത് ദയനീയമാണെന്നാണ് രചന പറയുന്നത്. പശ്ചിമഘട്ടത്തിന്റെ പരിസ്ഥിതിയെ കുറിച്ച് അടിയന്തര ശ്രദ്ധയും നടപടിയും ആവശ്യപ്പെടുന്ന സുപ്രധാന രേഖയാണ് മാധവ് ഗാഡ്ഗില്‍ കമ്മിഷന്‍ റിപ്പോര്‍ട്ട്. ഗാഡ്ഗില്‍ റിപ്പോര്‍ട്ടിനെ കുറിച്ച് ചിന്തിക്കേണ്ട സമയം അതിക്രമിച്ചിരിക്കുന്നു, ഭാവി തലമുറയ്ക്കായി പശ്ചിമഘട്ടത്തെ സംരക്ഷിക്കാനും ആവശ്യമായ നടപടികള്‍ നടപ്പിലാക്കേണ്ടത് വളരെ അത്യാവശ്യമാണെന്നും രചന സമൂഹ മാധ്യമങ്ങളിൽ കുറിച്ചു..
രചനയുടെ കുറിപ്പിന്റെ പൂർണ്ണ രൂപമിങ്ങനെ, ശ്രീ മാധവ് ഗാഡ്ഗിലിന്റെ റിപ്പോര്‍ട്ടിനെ കുറിച്ച് ചിന്തിക്കേണ്ട സമയം അതിക്രമിച്ചിരിക്കുന്നു. വിദഗ്ധരുടെ അഭിപ്രായം സ്വീകരിച്ച് അവര്‍ റിപ്പോര്‍ട്ട് സമര്‍പ്പിച്ചിട്ടും അതെല്ലാം പാഴായി പോകുന്നത് ദയനീയമാണ്. ദയവായി ഗാഡ്ഗില്‍ റിപ്പോര്‍ട്ട് പരിഗണിക്കുക. പശ്ചിമഘട്ടത്തെ കുറിച്ചുള്ള ശ്രീ മാധവ് ഗാഡ്ഗില്‍ കമ്മിഷന്‍ റിപ്പോര്‍ട്ട് പശ്ചിമഘട്ടത്തിന്റെ പരിസ്ഥിതിയെ കുറിച്ച് അടിയന്തര ശ്രദ്ധയും നടപടിയും ആവശ്യപ്പെടുന്ന ഒരു സുപ്രധാന രേഖയാണ്.
വളരെ വിപുലമായ, ഗവേഷണത്തിലും വിദഗ്ധാഭിപ്രായത്തിലും അധിഷ്ഠിതമായ റിപ്പോര്‍ട്ട്, ഈ ജൈവവൈവിധ്യങ്ങളുടെ കലവറ സംരക്ഷിക്കുന്നതിനുള്ള സുസ്ഥിര വികസന പ്രവര്‍ത്തനങ്ങളുടെ അടിയന്തിര ആവശ്യകത എടുത്തു കാണിക്കുന്ന ഒന്നാണ്. വിദഗ്ധര്‍ അവ സൂക്ഷ്മമായി പഠിച്ചതിന് ശേഷം സമര്‍പ്പിച്ച നിര്‍ണായക ഉള്‍ക്കാഴ്ചകളും ശുപാര്‍ശകളും അവഗണിക്കുന്നത്, പരിസ്ഥിതിക്കും പ്രാദേശിക സമൂഹങ്ങള്‍ക്കും അപകടകരമാണ്.
ഇത്തരത്തിലുള്ള മുന്നറിയിപ്പുകള്‍ നാം ശ്രദ്ധിക്കേണ്ടതും ഭാവി തലമുറയ്ക്കായി പശ്ചിമഘട്ടത്തെ സംരക്ഷിക്കാനും ആവശ്യമായ നടപടികള്‍ നടപ്പിലാക്കേണ്ടത് വളരെ അത്യാവശ്യമാണ്. മനുഷ്യരാശിയോട് ഒരു ഓര്‍മപ്പെടുത്തല്‍ എന്ന നിലയില്‍ പറയുകയാണ് നമ്മുടെ പരിസ്ഥിതിയെ സംരക്ഷിക്കുക എന്നത് ഒരു തിരഞ്ഞെടുപ്പ് മാത്രമല്ല, ഭാവി തലമുറകളോട് നാം കടപ്പെട്ടിരിക്കുന്ന ഉത്തരവാദിത്തം കൂടിയാണ്. ഇതിനെ കുറിച്ച് വലിയ അറിവില്ലാതിരുന്ന എനിക്ക് വ്യക്തമായി കാര്യങ്ങള്‍ പറഞ്ഞു തന്ന ഡിസാസ്റ്റര്‍ മാനേജ്‌മെന്റ് വിദ്യാര്‍ഥിനി കൂടിയായ എന്റെ ശിഷ്യയ്ക്ക് നന്ദി.
Leave a Reply